دوستلاریم!

کئچن مطلبده «جبار باغچه» بانین یاشامین اوخودوق. دوستوم آیدا بیات خانیم بویوردولار ایر جبارباغچه باندان تورکو بیر اوشاق شئعری تاپا بیلسم وئبه قویوم. منده بو دوستومون سؤزونه حؤرمت ائده رک کیتابلارا باش ووردوم. «سؤز بازاری» کیتابیندا کی سلیمان نوراللهی اونون ییغیشدیرماسینا زامان قویوب و چوخ گؤزل شکیلده او کیتابی ایشله ییبدیر «جبار باغچه بان» داندا بالا شئعر و یاشامین گتیریب دیر. منده او مطلبی ال دیمه میش سیزه گتیریرم.

اویاق باغبان

«میرزا جبار باغچه بان اوچ ایش گؤروب. ایلک دؤنه کر و لال اوشاغلار اوچون اوخول (مدرسه) آچیب. و ایلک اوشاغلار باغچاسی نی (کودکستان) تأسیس ائدیب و اوخویوب یازماق اوچون یئنی بیر اوسلوبون مبتکری اولوبدور. منجه باغچه بانی ایراندا «تورک دیلینده اوشاق شعری نین آتاسی» دا آدلاندیرا بیله ریک. پهلوی دؤرونده تورکو دیلی نین یاساق (ممنوع) اولماسینا گؤره باغچه بان کیتابلاری نین چوخونو فارسجا یازیب دیر. اما اونون کیتابلاری نین ایچینده اوشاقلارا یازدیغی «پروانه نین کیتابی» گؤزه چارپیر. باغچه بان خیامین رباعی لرینده تورکجه یه ترجمه ائدیب دیر. باغچه بانین اوشاق شعرلری نین بیریسینی اوخوجولارا تقدیم ائدیریک.» یاشاسین سلیمان نوراللهی به یی. بو شئعری اوخویاق.

«پروانه نئجه قیزدیر؟»

بیر گون دوردوم تهراندان

اوزاق – اوزاق یوللاردان

هیققانا – ها – هیققانا

گلدیم آزربایجانا

نلر گؤردوم من اوردا

قوشلار اوخور شن اوردا

کهلیک گولور داغیندا

بولبول اوخور باغیندا

باغلاری نین چیچه گی

تاقچالارین بزه گی

هله سن باخ باداما

چیچک گولور آداما

آزربایجاندا هر یئر

گولدور، چمن، چیچک دیر

گلدیم چیخدیم تبریزه

ایندی دئییم من سیزه

گزه – گزه ها بئله

گلدیم پروانه گیله

چالدیم چاق – چاق قاپی یا

هئی شاققا - شاق قاپی یا

گؤردوم کی بیر سس گلدی

سوروشدو کی او کیمدی؟

بو سس نه سس، قوش سسی

بولبول سسی، قوش سسی

بیلدیم کی پروانه دی

پروانه بیر دانه دی

دئدیم کی پروانه جان

عمیندی قاپی چالان

سئوینجی باشدان آشدی

قاپینی تئزجه آشدی

ائشیگه بیر قیز چیخدی

دئدیم بس اولدوز چیخدی

اولدوز دگیل دی آی دی

قاشلاری بیرجوت یای دی

ساچلاری ساپ ساری دی

دیشلری میرواریدی

دوداغی کی قاچاردی

ائله بیل گول آچاردی

اولدوز نه دی آی نه دی

قیزین آلنی آینادی

بئله گؤزل قیز اولماز

نه آی نه اولدوز اولماز.