نازلامالارکیتابیندان - مهدی دهقان

عزیزیم یاراسینا

قاشلارین قاراسینا

قوی آنان قوربان اولسون

اوره گین یاراسینا .

***

داغلارین لالاسینا

گؤزلرین قاراسینا

آنالار قوربان اولسون

اؤز کؤرپه بالاسینا .

***

قالالار آی قالالار

لاچین اوردا بالالار

آنالار بالا وئرمز

یوخسا گوجله آلالار.

***

من دئمیرم آی اولماز

یاز اولماسا، یای اولماز

چوخ ننه لر قیز دوغار

بیزیم قیزا تای اولماز.

***

دریا اوللام، بولاننام

سوجاق اوللام، سولاننام

ساغ گؤزوم سنه قوربان

سول گؤزومله دولاننام.

***

بالاما جان دئمیشم

آغلاما، جان دئمیشم

بالام دیل آچان گونه

قوزو قوربان دئمیشم .

***

خیرداجاسان، مزه سن

سن هر گولدن تزه سن

قوربان اولوم اوگونه

آیاق توتوب گزه سن.

***

یول اوسته یولاق اوللام

آخارام بولاق اوللام

سن منیم اؤز بالامسان

اؤزوم گؤز قولاق اوللام.