من بو وئبده چوخ اورک سؤزلریمی یازا بیلمه ییرم. یانی یازسام دئیرلر بو قیز سیاسی ایشله ره باخیر، بو قیز خائین دیر، بو قیز... آما من نه خائینم نه بئله بئله ایشله ری باشارارام ونه بیزلره بو ایشلر یاراشار. آما ایلده بیر یول اولالالی ایسته ییرم اؤز اورک سؤزومو بو وئبده یازام. اودا «دونیا اوشاق گونو» نده دیر. دوز بیلدیر بو واختلار(ساعات ۲) منه زنگ آچدیلار قوردوغوم برنامه نی لغو ائدم، قوناقلیق حرمتین پوزوب قوناقلاری ائشیکده قویام. و من بو ایشی گؤرمه یه رک برگه لر دولدورماغا و ... مجبور اولدوم؛ آما بو ایل اونون دردیندن و بو کی اوشاقلاری هله اوشاقلیقدا خشونت ایله اوز به اوز ائتمه یک دوینا اوشاق گونونه برنامه قورماغا ال آیاغیم گلمه دی. قورخمادیم؛ یوخ اصلن قورخمادیم. ننگ اولسون ایر بو دونیادا وجداندان سونرا بیر ایشدن قورخام. آما منطیق سیز انسانلارین الینده بازداشت چکنلر بیلرلر من نه دئییرم بس برنامه قورمادیم آما حئیفیم گلدی دئمه ییم:

دونیا بیر یانا، وطن بیر یانا. ایر بیر آرزوم وارسا او وطنین آزادلیغی، ایر بیر نیسگیلیم وارسا اودا وطن نیسگیلی، ایر بیر غمیم وارسا او وطنین مظلومیت غمی دیر. تانریم الیمدن توت وطنه چالیشماغا، تانریم اراده وئر تام عؤمرومو وطنه خلف بیر بالا اولوم.

و تانریم بو گونلر داها دیلیمین و فرهنگیمین مظلومیتی اینجیدیر بیلمه می. بو گونلر اوشاقلارین داها فارس دانیشماسینا، بو گونلر داها تلویزیوندا اوشاقلارا وئریلن کارتونلارا، بو گونلر داها آرتیق اوشاقلارین کیتاب درسله رینه، آدلارینا فیکیر وئریرم. بو فیکیرلر همشه کی دغدغه لریم اولالی آما بو گونلر داها بیله می اینجیدیر و اوره گیمی درده گتیریر دئیم کی:

من آذربایجانین حسرتلی بالاسی، من آذربایجانین غملی بالاسی و من آذربایجانین مظلوم بالاسی نه کارتونوم وار، نه آدیم تورکودورو نه کیتابیم اؤز دیلیمده یازیلیر. من نئیله ییم تانریم ؟

بیر بئله غمله، بیر بئله حسرتله :

دونیا اوشاق گونو سیزه قوتلو اولسون آذربایجانیمین حسرتلی بالالاری.