لايلا

بئشيک نغمه لری:

قيزيل گول بوتام، لايلای

عطرينه باتام، لايلای

بالام عرسييه گله

تويونو توتام، لايلای.

***

لايلای دئديم ياتاسان

قيزيل گوله باتاسان

گول ياستيغين ايچينده

شيرين يوخو تاپاسان.

***

لايلای دئديم هميشه

کاروان گئدر ائنيشه

ياستيغيندا گول بيتسين

دؤشه گينده بنؤوشه.

***

لايلای دئديم گونده من

کؤلگه ده سن، گونده من

ايلده بير قوربان اولار

سنه قوربان گونده من.

***

لايلای بئشيگيم، لايلای

ائويم-ائشيگيم، لای-لای

سن گئت شيرين يوخويا

چکيم کئشيگين، لايلای.

***

لايلای قوزوم، آغلاما

اوره گيمی داغلاما

يات، يوخون شيرين اولسون

يوخوما داش باغلاما.

***

لايلای، آ گلين بالا

يوخوسو درين بالا

تانريدان عهديم بودور

تويونو گؤروم، بالا.

***

لايلای امگيم بالا

دوزوم، چؤرگيم بالا

گؤزله رم بؤيويه سن

گؤروم کؤمگين بالا.