آذربايجان فولكلوروندا اوشاقلارين يئری

نوشته شده توسط احد فرهمندی (اوياق)

گيريش:

آذربايجانين مدنی ـ فيكری تاريخی ان اسكی عصرلردن باشلاميش بو گونه قد‌ر ياشاييشينا داوام وئريب. تاريخ بويونجا آذربايجاندا ياشايان توركلرين دوغال احساس، آيدين دوشونجه و كوتله‌وی حيات تجربه‌لری بوردا جانلاناراق اؤز قاينار باجاريقلاريندان باش توتوب سنه‌لری آرخادا قويوب بيزيم اليميزه چاتان مدنی- فيكری بؤلوملردن بيريده اوشاقلار آغيزين ادبياتی اولموشدور.

فولكلور؛ آغيزادبياتی، خالق حكمتی و كوتله بيليكلری دئمكدير. خالق مدنيتی اينسان حياتينين ايلكين چاغلاريندان باشلاميش سايسيز ائنيش ـ يوخوشلار آرخادا قويوب، داورانيشلار سوزگوجويندن كئچه‌رک بيزيم عصريميزه چاتميشدير.

بيزيم آغيز ادبياتيميز دونيانين ان زنگين اسكی خالق ادبياتيندادير. بوتون ميللتر آراسيندا اولدوغو كيمی بيزيمده فولكلور خزينه‌ميزده ائليميزين اوشاقلار و ناز بالالاری اوچون ياراتديغی بول ـ بول اؤرنكله ره راستلاشيريق.

فولكلوروموزدا اوشاقلار اوچون وئريلن بؤلوملرده، زنگين مدنيته يييه اولان خالقيميزين، ايستک آرزی، كدر- سئوينج، عادت ـ عنعنه و دونيا گؤروشلو باخشيلارين گؤرمک اولور. بو ادبيات درين دوشونجه و پاک احساسلارين توره‌نيشی اولدوغو اوچون ديلين ايفاده طرزی ساده و تميزدير. اونون اؤيره‌ديجی و بديعی اهميتی داها اؤنملی دير. آتالارسؤزو، باياتيلار، لايلالار، تاپماجالار، ناغيل لار، داستانلار، ماهنيلار، حكايه‌لر، اويونلار، اوخشامالار، نازلامالار و ... قوللارين درين دوشوندوكده گؤروروک كی بونلارين يارانماسی اوشاقلاريميزدا، ديله، ائله، يوردا و حياتا محبت باغليليقلارين آرتيريب گله‌جک ياشايیشلارينا بوللو اومودلار توره‌ده‌رک خالق دوشمنلرينه قارشی كينه و نفرت حسی اويادير.

آردی وار...