بيلندر
بيلندر
قديم زامانلاردا گنجه شهرينده بير اوغلان ياشاييردي. عاغيللي و حاضير جاواب اولدوغوندان اونا بيلندر دئييرديلر. او بيرگون بيرددن گؤردو كي، قولتوغوندا خوروز توتوب ائششهيين اوستونده اوتورموش بير نفر اونلارا طرف گلير. كندلي پالتاري گئيميش بو آدام قونشو اؤلكهنين وزيريايدي. وزير چوخ تدبيرلي و حاضير جاوابايدي؛ اونا گؤرهده خاقان اونو تئز – تئز باشقا اؤلكهلره دانيشيغا گؤندهرردي. بو دفعه خاقان اونو گنجه حكمدارينين يانينا گؤندرميشدي. وزير اوشاقلاري سسلهدي. بيلندر ايرهلي كئچيب سوروشدو:
- نه بويوروسان، عمي؟
- دئگينن گؤروم، بو شهرين بؤيوكلريني هاردا گؤرمك اولار؟
- گئدك، من سيزه گؤستهريم.
بير قدر گئدندن سونرا بيلندر بير كاروان سارانين قاباغيندا داياندي:
- باخ عمي، بيزيم شهرده بؤيوكلر بورادا ياشاييرلار. اودو ائي، اؤزلريده اورادا دوروبلار.
وزير بيلندرين گوسترديگي طرفه باخاندا اوچ – دؤرد دوه گؤروب اوجادان گولدو:
- آي عاغيلسيز اوشاق، بوجور بؤيوكلر يوخ ائي، من دئينلرين اوزون ساققالي اولور، - دئيه اؤز ساققاليني گؤستردي.
- هه، باشا دوشدوم، گئدك.
اونلار گليب بير حيهطه چاتديلار. بيلندر گئچيب طؤولهنين قاپيسيني آچدي. اوردان بئش – آلتي كئچي چيخدي:
- عمي، بيزيم شهرده بونلاردان اوزون ساققاللي يوخدور.
سؤز گولشديرمهيه گلن وزير برك آجيقلاندي:
- بونا باخ، بير قاريش بويوايله مني دولايير. بؤيوك دئيهنده دوه، ساققاللي دئينده كئچي گؤستهرير. من دانيشماغا آدام آختاريرام، بيلدين؟
- نه؟ آدام آختاريرسينيز؟ آدام من، ائله منيمله دانيشيندا.
علاجي كسيلميش وزير دئدي:
- آداما باخ، گؤر كيمينله دانيشماق ايستهيير؟ ياخشي، بير اوزاق يئردن گليب برك آجميشيق. بيرجه ديناردا پولوم وار. بو بير دينارا نه آليم كي، هم اؤزوم، هم خوروزوم، همده ائششهييم يئيه بيلسين؟
بيلندر گؤزلريني قيييب باشيني قاشييا – قاشييا جاواب وئردي:
- گئدك، عمي! من ائله بير شئي آلارام كي، اوچونوزده يئيرسينيز.
اونلار بازارا گلديلر. بيلندر تپه كيمي قالانميش يئميشلردن بيريني سئچيب وزيره وئردي.
- بويورون، لاپ سيز دئيهن شئيدير. ايچيني اؤزونوز يئيين، توخوملاريني خوروزونوزا وئرين، قابيغينيدا آتين ائششهيه.
اؤزونو هاميدان عاغيللي بيلن وزير اؤز – اؤزونه دئدي:
- بير شهرين كي، اوشاقلاري بو قدر عاغيللي اولا، گؤر بؤيوكلري نئجه اولار؟
او فيكيرلهشيب، الي بوش گئري قاييتدي.
كتاب: آذربايجان اوشاق ناغيللاري
حاضيرلايان: معصومه اژدري
اوزون کوچه