اوزون کوچه

بير قدر دولانديق، سونرا يولوموز چاي كنارينا دوشدو. آمما اوغلومودا بي داماق گؤروردوم. چون تربيه اؤز قايداسينجا (اوشاغين اؤز تربيتي ) بودا اؤز قايداسينجا و اونونچون دا چوخ ايناد ائتمه مك بابه تيندن، دريا كناريندا تاباغا دوزولموش مئيوه لردن ايكي شاهييا ايكي دنه ياخشي قيرميزي آلما آلديم و ايكي سيني ده وئرديم اوغلوما. هرچند اوغلوم آلمالاري مندن آلدي، آمما گؤردوم كي، كونولسوز آلدي. من اوندان بي دماقليغينين سبه بيني سوروشماديم؛ چونكو سببي آشكار ايدي. بازاردا بير آز بوندان قاباق او مندن ايكي شئي ايسته دي ، هئچ بيريني آلماديم، سونرا دا قنادي دوكانينين قاباقيندان كئچنده شوشه نين دالينا دوزولموش رنگارنگ كونفئت و شيرينيياتدان ايسته دي آلماديم. اوغلوم او درجه­ده مندن ناراضي ايميش كي، من آلمالاري اونا وئرندن سونرا دا گئنه بير سؤز دانيشماق ايسته مه دي و من اونا وئرديييم سوآللارا دا چوخ مئييلسيز جاواب وئردي. داخي اونو بئله قاشقاباقلي گؤرنده من اؤزوم ده بي داماق اولدوم  و آزرنئفت اداره سينين قاباقيندا دوران ترامواي واگونلارينين بيرينه اوغلومو قالخيزديم و اؤزوم ده مينديم كي، گلك ائويميزه. واگوندا هله بيزيم ايكيميزدن باشقا بيركس يوخ ايدي. اوغلوم بويدا بير يئتيم روس اوشاغي جير – جيندير ايچينده، اوز – گؤزو قاپقارا چيركلي و ايرنج، گلدي دوردو قاباقيميزدا و مندن قپيك پول ايسته دي. جيبيمده آنجاق بيرآبباسي گوموش پول واريدي. من اوشاغا بير سؤز دئمه ديم كي، كئچيب گئتسين. بير نئچه آرواد و كيشي واگونا گيرديلر و ساقيميزدا – سولوموزدا يئر توتدولار. بورادا منيم فيكريم گئتدي يئتيمه پول وئرمه ييمه و ديلنچي يه پول وئرمك لازيمدي، يا لازيم دئييل مي مسأله سي مني باشلادي مشغول ائتمه يه؛ هر كس نه دئيير دئسين، آنجاق ديلنچي اوشاغا هئچ بير شئي وئرمه مك منيم خوشوما گلمه دي. بورادان اونا اشاره ائتميرم كي، من هئچ بير ديلنچي يه يوخ دئمه رم؛ چونكو اولا بيلر كي، بير پارا فيلوسوفلارين ديلنچي يه پول وئرمك، اونو بدبخت ائتمك صيفه تي بلكه منه ده سيرايت ائديب دير. آنجاق سؤزون حقيقت تي بودوركي، بوگونكو ديلنچي اوشاغا بيرقپيك وئرمه مه ييم منيم بورادا خاراب ائتدي؛ او سبه به خاراب ائتدي كي، هامان ديلنچي اوشاق ياشدا منيم آتالي و آنالي اوغلوم، ايني – باشي تزه، قارني توخ، بو ساعات بورادا منيم ساغ طرفيمده مندن اينجيميش اؤتورموشدو كي، نييه من اونا كونفئت آلماديم ، آنجاق ايكي آلما آلديم.  واگونوموزحركت ائديب گئدنده آكوشكانين شوشه سينين داليندان گؤردوم كي، هامان ديلنچي اوشاق يئرده دوروب بير قيرميزي آلماني آغزينا باسيب گميرتله يير. قاباقجا بير شئي دويماديم؛ آمما هامان دقيقه يانيمداكي اوغلومون آلمالاري ياديما دوشدو و چوندوم اوشاغا طرف. اوغلوم گوله – گوله منه ياواشجا بونو دئدي:

- دده، آلمانين بيريني وئرديم ديلنچي اوشاغا.

بيردنه قيرميزي آلما اؤز – اؤزلويونده بير شئي دئييل؛ اونون قيمتي ايكي قپيكدير و يئييب قورتاراندان سونرا هئچ بير شئي دير. آمما معنوي ايشلرده بيرآلمانين ديه ري اولا بيلر چوخ بؤيوك اولسون. اوقدريونگوللوك و كونول خوشلوغوكي، بورادا ايكي قپيكليك آلمادان منه گليب چاتدي، نهايت دره جه ديدي. فيليسوفييه عالمينه گلديكده، غئيريله ري ديلنچييه كوچه ده پارا وئرمه يي نه جور باشا دوشورلر دوشسونلرو اينسانيت متخصصيص لري بومسأله ني نه تهر حل ائديرلر ائتسينلر، آنجاق منيم بالاجا اوغلوم ايكي آلماسينين بيريسيني بير يئتيم اوشاغا وئردي و اولا بيلركي، اوغلوم دا يئكلنددن سونرا، بير پارا عاليملرين « كوچه ده ديلنچي يه پارا وئرمه يينيز» نصيحتيني ائشيدندن سونرا، اونلاري كوچه ده گؤرنده منيم كيمي اوز چؤنده ره جك دير. آنجاق هله كي، ايندي اوغلوم بو ايشلري باشا دوشمور و اونونچون ده ايكي آلمانين بيريني يئتيم اوشاغا وئرير.