تولکو و ایلان
تولکو و ایلان
کؤچورن: رقیه کبیری - تبریز
بیر وارایدی، بیری یوخایدو. بیر ایلان، بیرده بیر تولکو وارایدی. بونلارین یووالاری بیر-بیرینین یانیندا ایدی.آمما بیر-بیرینین ائوینه گئتمیردیلر. بیر گون تولکو اوودان گلیردی. ایلان دا بیر قورباغا توتوب، کئفایله یوواسینین آغزیندا یئییردی. تولکو اونو گؤرنده، قاچیب یوواسینا گیردی. ایلان قورباغانی یئییب قورتاراندان سونرا، تولکونو چاغیریب دئدی:
-قونشو، باییرا چیخ سنه سؤزوم وار.
تولکو اول ایستهدی چیخماسین، سونرا فیکیرلشدی کی،قونشولوقدا یاخشی ایش دئییل، کناردا دورارام، منی وورماق ایستهسه، قاچارام.
قاپینین آغزیندان باشینی چیخاردیب دئدی:
-ایلان لهله نه دئییرسن؟
ایلان دئدی:
-یاخین گل، سؤز دئییرم.
تولکو دئدی:
-یوخ لهله، من گله بیلمهرم سؤزونو اوردان دئه.
ایلان دئدی:
-قورخما یاخینا گل.
تولکو دئدی:
-اوز وورما، گله بیلمهرم.
ایلان دئدی:
-قونشولوقدا یاخشی دئییل کی، بیر-بیریمیزدن آرالی گزک. گل عهد-پیمان ائیلهیک، بیر-بیریمیزه طاماح سالمایاق.
تولکو راضی اولدو.
اونلار عهد پیمان ائلهدیلر بیر-بیرلریایله یولداش اولسونلار.بیر مدت بئله کئچدی .بیر گون اونلار سفره گئدهسی اولدولار. یولا دوشوب، اوچ گون، اوچ گئجه یول گئتدیلر قاباقلارینا بیر بؤیوک چای چیخدی .تولکو اوزمک بیلیردی آمما ایلان یوخ.
ایلان یالواریب دئدی:
-آی قارداش، من اوزمک بیلمیرم، قوی بوغازینا دولانیم، منی چایدان کئچیر.
تولکو راضی اولوب دئدی:
-دولان چایدان کئچک.
ایلان تولکونون بوغازینا دولاندی، چایی او تایا کئچدیلر.
تولکو دئدی:
-دی بوینومدان آچیل گئدک.
ایلان گولوب دئدی:
-هارا آچیلیم؟ من ائله بوندان اؤترو سنایله یولداش اولموشدوم. آجمیشام، قانینی ایچمک ایستهییرم.
تولکو یالواریب دئدی:
-بس عهد-پیمانیمیز؟
ایلان دئدی:
-نه عهد-پیمان؟ بو ساعات سنی ائله ووراجاغام کی، پارچا –پارچا اولاسان.
تولکو گؤردو ایلان نامردلیک ائیلهییر، اونو ووراجاق. کئفینی کوک توتوب دئدی:
-ایلان لهله، من دونیادان بئزمیشم. اؤلمک ایستهییرم. ائله سنه دئیهجکدیم، قارداش منه یاخشیلیق ائله، وور اؤلوم، دونیانین قایغیسیندان قورتولوم. آمما سنایله چؤرک یئمیشم، یولداشلیق ائلهمیشم. عمرومون آخیر چاغیندا قوی اوزوننن اؤپوم سونرا منی وور.
ایلان تولکونون شیرین دیلینه ایناندی. باشینی اونون آغزینا طرف اوزالتدی کی، اوزوننن اؤپسون. تولکو او ساعات اونون بوغازیندان توتوب ائله بوغدو کی، ایلانین گؤزلری کلهسینه چیخدی. ایلان یالواریب دئدی:
-آی تولکو قارداش، گوناهیمدان کئچ، اؤلونجه قوللوغوندا اولارام.
تولکو دئدی:
-یولداشینا خائین اولانین آخیری باخ بؤیله اولار.
تولکو ایلانین یالوارماغینا باخماییب اونو اؤلدوردو.
آذربایجان ناغیللاری.
اوزون کوچه